Friday 29 February, 2008

Jis simt bhee dekhoon

Jis simt bhee dekhoon nazar aataa hai ke tum ho

ai jaan-e-jahan ye koi tum saa hai ke tum ho

Ye khvaab hai khushbuu hai ke jhonkaa hai ke pal hai

ye dhundh hai baadal hai ke saaya hai ke tum ho

is deed ki saa-at main kai rang hain larazaan

main hoon ya koi aur hai dunya hai ke tum ho

ye umr-e-gurezaan kaheen theh-re to ye jaanoon

har saans main mujh ko yehi lagata hai ke tum ho

har bazm main mozu-e-suKhan dil zad-gaan ka

ab kaun hai shireen hai ke laila hai ke tum ho

ik dard ka phaila hua sehra hai ke main hoon

ik moaj main aaya hua darya hai ke tum hoa

abaad ham aashufta saron se naheen maqtal

ye rasm abhi shehr main zinda hai ke tum ho

ai jaan-e-'Faraz' itani bhi taufeeq kise thi

ham ko gham-e-hasti bhi gavara hai ke tum ho

No comments: