Ek poem

Gungunaate huwe aanchal kee hawaa de mujh ko,Ungliyaan phair kar baaloun mein sulaa de mujh ko,

Jiss tarah faaltu guldaan padey rehte hain,Apnay ghar ke kissee koney se lagaa de mujh ko,

Yaad kar ke mujhe takleef hee hotee hogee,Eik qissaa hoon puranaa saa bhulaa de mujh ko,

Doobte doobte aawaaz teree sunn jaawoon main,Aakhari baar tu saahil se sadaa de mujh ko,

Main tere hijr mein chup chaap naa marr jaawoon kaheen,Main hoon saqte mein kabhee aa kar rulaa de mujh ko,

Dekh main ho gayaa hoon badnaam kitaabon ki tarhaa,Meree tashheer naa kar abb toh jalaa de mujh ko,

Roothnaa teraa meree jaan liye jaataa hai,Aise naaraaz naa ho hans ke dikhaa de mujh ko,

Log kehte hain ke yeh ishq nighal jaataa hai,Main bhee iss ishq mein aayaa hoon duaa de mujh ko,

Yahee auqaat hai meree tere jeevan mein kaheen,Koyee kamzor saa lamhaa hoon bhulaa de mujh ko,

Aur kuch naheen maangungaa mere maalik tujh se,Uss kee galiyoun kee buss khaak banaa de mujh ko.